په‌یامی نه‌ورۆزیی سکرتێری گشتیی حیزبی دێموکراتی کوردستان، به‌ڕێز خالید عه‌زیزی
سێ شەممە, 20 ئازار 2012 10:35


هاونیشتمانه‌ خۆشه‌ویسته‌کان!

سه‌رجه‌م کۆمه‌ڵانی خه‌ڵک له‌ رۆژهه‌ڵاتی کوردستان!

بنه‌ماڵه‌ و که‌س و کاری شه‌هیدان! وه‌ هه‌روه‌ها بنه‌ماڵه‌ی زیندانیانی سیاسی!

به‌بۆنه‌ی نه‌ورۆز جه‌ژنی کۆنی کورده‌واری پڕ به‌ دڵ پیرۆزباییتان لێده‌که‌م.
هیوادارم ساڵی تازه‌ ساڵێک بێ بۆ هه‌موو لایه‌کمان خێر و خۆشی تێدا بێ. له‌
ساڵی رابردوودا ئێمه‌ به‌گشتی هه‌موو لایه‌کمان له‌ مه‌یدانی جۆراوجۆر
هه‌وڵمان داوه‌ چ له‌ ئاستی ژیانی رۆژانه‌ چ له‌ ئاستی جێبه‌جێ کردنی ئه‌رکه‌
سیاسییه‌کانمان دا بچینه‌ پێشێ. دڵنیام له‌ ساڵی تازه‌دا هه‌موو لایه‌کی ئێمه‌
به‌ هیوا و ئومێدێکی زۆره‌وه‌ ساڵی تازه‌ ده‌ست پێده‌که‌ین. هیوادارم به‌
له‌به‌ر چاو گرتنی ئه‌زموونه‌کانی ساڵی رابردوو بتوانین ساڵی تازه‌ و داهاتووی
خۆمان بۆ خۆمان به‌گشتی و بۆ نه‌ته‌وه‌که‌مان به‌تایبه‌تی ده‌وڵه‌مه‌ندتر
بکه‌ین. له‌ ساڵی رابردوودا کۆمه‌ڵێک ئاڵوگۆڕ له‌ ناوچه‌که‌دا هاته‌ پێشێ.
کۆمه‌ڵانی خه‌ڵك له‌ وڵاتانی جۆراوجۆر دژی ئیستبداد و دیکتاتۆری راپه‌ڕین.
هه‌روه‌ها له‌ ساڵی رابردوودا مه‌سه‌له‌ی کورد به‌گشتی چ له‌ عێراق، چ له‌
سووریه‌، چ له‌ تورکیه‌ و تا راده‌یه‌کی به‌رچاویش له‌ ئێران بۆته‌ مه‌وزووعێک
که‌ له‌ ئاستی نێوده‌وڵه‌تی و ناوچه‌یی نه‌ته‌نیا ئینکار ناکرێ به‌ڵکوو وه‌ک
فاکتۆڕێک هاتۆته‌ نێو مه‌وزووعه‌کان و کێشه‌کان.

له‌ ساڵی رابردوودا ئێمه‌ شاهیدی خه‌بات و چالاکیی کۆمه‌ڵانی خه‌ڵک له‌ ئێران
به‌گشتی دژی کۆماری ئیسلامی بووین و له‌و پێوه‌ندییه‌دا فه‌عالییه‌ت و چالاکی
و جموجۆڵی کۆمه‌ڵانی خه‌ڵک له‌ رۆژهه‌ڵاتی کوردستان دژی کۆماری ئیسلامی به‌
شێوازی جۆراوجۆر چۆته‌ پێشێ و به‌خۆشییه‌وه‌ ئێستا پێ ده‌نێینه‌ ساڵێک که‌
له‌و ساڵه‌دا کۆماری ئیسلامی له‌ ئاستی نێوده‌وڵه‌تیدا پتر ته‌ریک
که‌وتۆته‌وه‌، له‌ پێوه‌ندی له‌گه‌ڵ ئه‌و هه‌را و کێشه‌یه‌ی که‌ له‌ رابیته‌
له‌گه‌ڵ پڕۆژه‌ ئه‌تۆمییه‌که‌ی دا دروستی کردوه‌، کۆمه‌ڵگه‌ی نێوده‌وڵه‌تی
متمانه‌ی پێ ناکا، فشار له‌سه‌ر ئێران له‌ پێوه‌ندی له‌گه‌ڵ مافی مرۆڤ دا رۆژ
به‌ رۆژ په‌ره‌ ده‌ستێنێ. هه‌روه‌ها له‌ نێوخۆی وڵات کۆمه‌ڵانی خه‌ڵک رۆژ به‌
رۆژ پتر له‌و حکوومه‌ته‌ ناڕازی ده‌بن. بۆ ته‌واوی ئه‌وانه‌ی که‌ فکر له‌
داهاتووی ئێران و چه‌ند و چۆنی ئیداره‌ی ئێران ده‌که‌نه‌وه‌، مه‌سه‌له‌ی
ئه‌وه‌ی که‌ یه‌کگرتووییه‌کی ئێرانی له‌ دژی کۆماری ئیسلامی رۆژ به‌ رۆژ له‌
کۆڕ و کۆبوونه‌وه‌کان دا زیاتر ده‌بێ به‌ مه‌وزووع. هه‌روه‌ها له‌و
په‌یوه‌ندییه‌دا حیزبه‌ سیاسییه‌کانی کوردستانیش به‌ خۆشییه‌وه‌ به‌ به‌راورد
له‌گه‌ڵ رابردوو هه‌نگاو ده‌نێنه‌وه‌ بۆ وه‌ی که‌ زبانی لێک حاڵیبوون په‌ره‌
بستێنێ و ورده‌ ورده‌ له‌ وه‌حده‌تێکی نه‌ته‌وه‌یی به‌هێز نزیک بینه‌وه‌.

هیوادارم له‌ ساڵی داهاتوودا تاک تاکی ئێمه‌ وه‌ک ئه‌ندامانی کۆمه‌ڵگه‌ی
کوردستان به‌ ژن و به‌ پیاو، به‌ هه‌موو ئایینێك که‌ له‌ نێو خۆماندا هه‌مانه‌
و به‌ هه‌موو زاراوه‌کان به‌ نیسبه‌ت ئه‌رکه‌ نه‌ته‌وه‌ییه‌کانی خۆمان هه‌نگاو
بنێینه‌وه‌ و تێبکۆشین ئه‌وه‌ له‌ کۆمه‌ڵگه‌ی رۆژهه‌ڵاتی کوردستاندا به‌ قوه‌ت
بکه‌ین و ساڵی تازه‌ بکه‌ین به‌ ساڵی دانانی ئه‌رک بۆخۆمان.

دڵنیام پرۆسه‌ی رزگاری ئێمه‌،ڕۆسه‌ی گه‌یشتن به‌ مافه‌کانی نه‌ته‌وایه‌تی
خۆمان، پڕۆسه‌ی سه‌قامگیر کردنی دێموکراسی، کار و تێكۆشانی هه‌موو لایه‌کی
پێویسته‌. ته‌جروبه‌ نیشانی داوه‌ هه‌ر کار بکا و هه‌وڵ بدا و تێبکۆشێ،
حه‌تمه‌ن سه‌رکه‌وتوو ده‌بێ. ئێمه‌ له‌ دنیادا که‌ ئاوڕێک له‌ رابردوو و
خه‌باتی میلله‌تان ده‌ده‌ینه‌وه‌ ده‌قیقه‌ن ئه‌وه‌مان بینیوه‌ و هه‌موو
ته‌جروبه‌کانیش ئه‌وه‌یان نیشان داوه‌ و ئاڵوگۆڕه‌کانی ناوچه‌ و ئاڵوگۆڕه‌کانی
داهاتووی ئێران و ئه‌وه‌نده‌ی پێوه‌ندی به‌ قه‌زیه‌ی کورد به‌گشتییه‌وه‌
هه‌یه‌ هه‌مووی ئه‌وانه‌ خۆشبین (کننده‌)یه‌. بۆیه‌ ئێمه‌ هه‌موو ده‌لیلێکی
ناوچه‌یی، نێوخۆیی، نێوده‌وڵه‌تیی و هه‌روه‌ها شعووری سیاسی کۆمه‌ڵانی خه‌ڵک
له‌ ئێران و به‌تایبه‌ت شعووری نه‌ته‌وه‌یی کورد له‌ کوردستانی ئێرانمان
هه‌یه‌ که‌ به‌رانبه‌ر به‌ داهاتوو گه‌شبین بین و له‌سه‌ر ئه‌ساسی باوه‌ڕ به‌و
گه‌شبینییه‌ که‌ ئه‌و میلله‌ته‌ رزگار ده‌بێ و به‌ مافه‌کانی خۆی ده‌گا، ساڵی
تازه‌ ده‌ست پێ بکه‌ین.

هیوادارم له‌ ساڵی تازه‌دا هه‌موو لایه‌کمان به‌ یه‌که‌وه‌ به‌ رووحی وه‌حده‌ت
و یه‌کگرتوویی له‌گه‌ڵ کێشه‌کان رووبه‌ڕوو بینه‌وه‌ و رێگا چاره‌ی هاوبه‌شیان
بۆ ببینینه‌وه‌. ئه‌وه‌ش ئه‌رک له‌سه‌ر هه‌موو لایه‌کمان داده‌نێ. دڵنیام
ئه‌گه‌ر هه‌موو لایه‌کمان هه‌رکه‌س و هه‌ر لایه‌نێک له‌ حه‌ددی توانای خۆیدا
ئه‌رکه‌کانی خۆی جێبه‌جێ بکا، له‌ کۆتایی ئه‌وساڵدا دڵنیام به‌رهه‌م و
ده‌ستکه‌وته‌کانی ئێمه‌ به‌ به‌راورد له‌گه‌ڵ ساڵی پێشوو زیاتر و زیاتر ده‌بێ.

بۆ جارێکی دیکه‌ش نه‌ورۆزی هه‌موو لایه‌کتان پیرۆز بێ و هیوادارم به‌هار و
هاوین و پاییز و زستانێکی خۆشمان له‌پێش دابێ. هیوادارم ساڵی داهاتوو بکه‌ین
به‌ ساڵی لێک نزیکبوونه‌وه‌ و وه‌حده‌تی میللی، به‌ ساڵی په‌ره‌پێدانی کار و
تێكۆشانی هه‌موو لایه‌ک.

دیسان به‌هارێکی خۆش و پڕ ره‌نگتان هه‌بێ و هیوادارم نه‌ورۆز و رۆژه‌کانی دوای
نه‌ورۆز به‌ خێر و خۆشی و شایی و هه‌ڵپه‌ڕین و هه‌روه‌ها به‌ وه‌لانانی رق و
کینه‌ی رابردوو به‌ عومده‌ کردنه‌وه‌ی رووح و ئیحساس ئاشتی و لێک
نزیکبوونه‌وه‌ له‌گه‌ڵ یه‌کتر ئیدامه‌ بده‌ین و سه‌ره‌تای ساڵی تازه‌ به‌و
رووحه‌ دامه‌زرێنن. هه‌موو لایه‌کمان به‌ یه‌که‌وه‌ ساغ و سڵامه‌ت و هه‌موو
لایه‌کمان به‌ یه‌که‌وه‌ سه‌رکه‌وتوو بین.

نه‌ورۆزی هه‌موو لایه‌کتان پیرۆز.