وئازیزان و خۆشه‌ویستانی یانه‌ی کوردژین :
له‌مه‌ودوا هه‌موو هه‌فته‌یه‌ک بابه‌تێکتان پێشکه‌ش ئه‌که‌م له‌ ژێر ناونیشانی ( وڕێنه‌ ) ، له‌م گۆشه‌یه‌دا ڕه‌خنه‌کانی کۆمه‌ڵگای کورده‌واری به‌ شێوه‌یه‌کی گاڵته‌ ئامێز ئه‌خه‌مه‌ ڕوو ، هیوادارم هه‌نگاوێک بێت بۆ چاره‌سه‌رکردنی سه‌رجه‌م کێشه‌کانمان و به‌ هیوای ڕه‌زامه‌ندی ئێوه‌ی هه‌رده‌م ئازیزو خۆشه‌ویست ، فه‌رموون ئێستاش له‌گه‌ڵ به‌شی یه‌که‌می ( وڕێنه‌ ) :
((( بڕوا بکه‌ن له‌ خۆشیا نه‌مزانی کێ بوو ته‌له‌فونه‌که‌ی بۆ کردم ، هه‌ربه‌په‌له‌ ڕام کرد بۆ وه‌رگرتنی مووچه‌که‌م ، یه‌که‌م مانگ بوو که‌ مووچه‌که‌م زیاد ئه‌بوو ، کاتێ وه‌رم گرت ئه‌بینم موچه‌که‌م که‌می کردوه‌ !!!! خێرا خۆم گه‌یانده‌ لای به‌ڕێوه‌به‌ر تا بزانم مه‌سه‌له‌ چیه‌ ، ئه‌بینم زیاتر له‌ ( 1000 ) ئوتومبیل سه‌ره‌یان گرتوه‌ بۆ به‌نزین !!! زیاتر له‌ 5 کاتژمێر ڕاوه‌ستام ، ئاخر توخوا ئه‌مه‌ حاڵه‌ ؟؟؟ ئه‌وه‌نه‌م زانی پشت ملیان گرتم ، ئه‌بینم پۆلیسه‌ :
فه‌رموو گیان !
بۆ جگه‌ره‌ ئه‌خۆی ؟ نازانی ڕه‌مه‌زانه‌ ؟
بۆ نازانم به‌ڵام تۆ خۆت پۆلیسی ، جارێ جگه‌ره‌که‌ت بکوژێنه‌وه‌ ئینجا قسه‌ له‌گه‌ڵ من بکه‌ .
هه‌رچه‌ندم کرد سوودی نه‌بوو ، ناچار هه‌موو گڵۆپه‌کانم خسته‌وه‌ ناو زه‌رفه‌که‌و بردمه‌وه‌ بۆ دوکانداره‌که‌ ، پێم وت :
کاکه‌ گیان یه‌ک گڵۆپیان ئیشی نه‌کرد ئاخرخوا هه‌ڵناگرێ : پێی وتم خۆ به‌زۆر پێم نه‌فرۆشتووی ، فه‌رموو عاره‌بانه‌که‌ت ڕاکێشه‌ ،
عاره‌بانه‌که‌م ڕاکێشاو گه‌یشتمه‌ نزیک مزگه‌وته‌که‌و گوێم لێبوو مه‌لا ئه ی‌فه‌رموو : ئه‌وکه‌سه‌ی مه‌شرووب ئه‌خواته‌وه‌ گوناهباره‌ ، ئه‌وانه‌ی تا ( 300 ) مه‌تریش لێیان دووربن هه‌ر گوناهبارن !!!! ، خۆم ڕانه‌گرت و که‌وتمه‌ پێوانه‌ی دووری دوکانی مه‌شروب فرۆشه‌که‌ له‌ مزگه‌وته‌که‌وه‌ ، ئه‌بینم ته‌نها ( 120 ) مه‌تر بوو !! هه‌ر به‌په‌له‌ خۆم گه‌یانده‌ شاره‌وانی و چومه‌ خزمه‌تی سه‌رۆکی شاره‌وانی ، پێم وت : کاکه‌ گیان من وه‌ک فه‌رمانبه‌ر پارچه‌ زه‌ویه‌کم وه‌رگرتوه‌ که‌ به‌پێی تاپۆکه‌ی ئه‌بێ ( 250 ) مه‌تر بێ ، که‌چی ئێستا ئه‌بینم ئه‌ملاو ئه‌ولام کراوه‌ به‌خانوو ، به‌شه‌که‌ی من ته‌نها ( 120 ) مه‌تری ماوه‌ته‌وه‌ ، چاره‌م چیه‌ ؟؟ سه‌رۆک پێی وتم : هیچ جاره‌یه‌ک نیه‌ و ئه‌بێ چاوه‌ڕوان بکه‌ی تا دکتۆر له‌خه‌و هه‌ڵئه‌سێ !!!! وتم خوشکه گیان من مناڵێکی نه‌خۆشم پێیه‌ و
حاڵی باش نیه‌ ، ئاخر چۆن ئه‌بێ دکتۆر خه‌فه‌ربێ و بخه‌وێ که‌سیش نه‌توانێ بڵێ هه‌ڵسه‌ ؟؟ چار نه‌بوو چاوه‌ڕێم کرد تا هاته‌ ده‌ره‌وه‌ له‌ هۆڵی تاقی کردنه‌وه‌ و پێم وت : ها چیت کرد پرسیاره‌که‌ن ئاسان بوون یا نا ؟ هه‌ر ده‌ربچیت باشه‌ ، ئه‌ویش وتی :
به‌خوا نازانم پرسیاره‌کان چۆن بوون به‌س ده‌رئه‌چم چونکه‌ مامۆستایه‌کم به‌ کرێ گرتبوو هه‌مووی بۆ نووسیمه‌وه‌ ، بڕوا بکه‌ن
خه‌ریک بوو شێت ئه‌بووم له‌ داخی حاڵی ئه‌م میلله‌ته‌ ، باش بوو خوا ڕه‌حمی پێ کردم له‌و خه‌وه‌ نه‌عله‌تیه‌ ڕزگارم بوو ، به‌خه‌به‌ر هاتم ، ئه‌گینا شێت ئه‌بووم

نوسینی / هێمن زانکۆ / به‌رێوه‌به‌ری یانه‌ی کوردژین

تایبه‌ت به‌ کوردژین