بیرمه‌ که‌ گه‌نج بوم ، شه‌وێک له‌گه‌ڵ باوکم له‌ ڕیزی بلیت فرۆشتنی سێرک وه‌ستابووین .
له‌ پێش ئێمه‌وه‌ خێزانێکی قه‌ره‌باڵغ وه‌ستابوون ، له‌وه‌ ئه‌چوو باری داراییان باش نه‌بێت و پاره‌ی ته‌واویان پێ نه‌بێت .
شه‌ش منداڵ که‌ هه‌موویان ته‌مه‌نیان که‌متر له‌ 12 ساڵ ئه‌بوو ، جله‌کانیان کۆنه‌ به‌ڵام پاک و خاوێن  له‌به‌ریاندا بوو.
منداڵه‌کان هه‌موویان به‌ ئه‌ده‌ب بون  ، دوو دوو له‌ پشت دایک و باوکیانه‌وه‌ ده‌ستی یه‌کیان گرتبوو به‌دڵخۆشیه‌وه‌ سه‌باره‌ت به‌ بینین و بۆچونه‌کانیان له‌سه‌ر یاری سێرک که‌ به‌ ته‌مابوون تا چه‌ند ده‌قیقه‌یه‌کی تر بیبینن قسه‌یان ئه‌کرد ،
دایکیان قۆڵی مێرده‌که‌ی گرتبوو به‌ عه‌شقه‌وه‌ له‌به‌رامبه‌ریا زه‌رده‌خه‌نه‌یه‌کی جوانی کرد.
کاتێک گه‌شته‌ لای بلیت فرۆشه‌که‌ ،...
بلیت فرۆش وتی :" چه‌ند بلیتتان بۆ ببڕم "؟
باوکیان وه‌ڵامی دایه‌وه‌ : " ئه‌رک نه‌بێت شه‌ش بلیت بۆ منداڵ و 2 بلیت بۆ گه‌وره‌ .
بلیت فرۆشه‌که‌ نرخی بلیته‌کانی پێ وت .
باوکه‌که‌ له‌ بلیت فرۆشه‌که‌ نزیک بویه‌وه‌و به‌ ئه‌سپایی لێی پرسی :" ببوره‌ ، وتت چه‌ند ئه‌کات ؟!!
بلیت فرۆشه‌که‌ دیسانه‌وه‌ نرخی بلیته‌کانی دوباره‌ کرده‌وه‌ .
باوک و دایکی منداڵه‌کان به‌ بێتاقه‌تیه‌وه‌ ورته‌ ورتێکیان کرد .
دیار بوو پاره‌ی ته‌واویان پێ نه‌بوو بۆ بلیته‌کان ، به‌ دڵنیایه‌وه‌ بیریان له‌وه‌ ئه‌کرده‌وه‌ چ وه‌ڵامێکیان هه‌بێت بۆ منداڵه‌کانیان ؟
له‌ ناکاو باوکم ده‌ستی کرده‌ گیرفانی و 20 دۆلاری ده‌رهێناو خستیه‌ خواره‌وه‌ بۆ سه‌ر زه‌وی!
ئیجا دانه‌ویه‌وه‌و 20 دۆلاره‌که‌ی هه‌ڵگرته‌وه‌ ،
ده‌ستی دا له‌ شانی باوکی منداڵه‌کان وتی :" ببوره‌ کاکه‌ ئه‌و پاره‌یه‌ له‌ گیرفانی تۆ که‌وته‌ خواره‌وه‌"!
پیاوه‌که‌ که‌ هه‌ستی کرد و له‌ ڕاستیه‌که‌ی تێگه‌یشت ، هه‌رئاوا فرمێسک له‌ چاوانیا قه‌تیس مابوو ، پاره‌که‌ی وه‌رگرت و وتی زۆر سوپاسته‌که‌م.
پیاوێکی شه‌ریف بوو به‌ڵام له‌و کاته‌یا بۆ ئه‌وه‌ی له‌به‌رچاوی منداڵه‌کانیا ته‌ڕیق نه‌بێته‌وه‌ ، یارمه‌تیه‌که‌ی باوکمی قبوڵ کرد ،، له‌ دوای ئه‌وه‌ی که‌ منداڵه‌کان چونه‌ ژوری سێرکه‌که‌وه‌ ، من و باوکم له‌ ڕیزه‌که‌ چوینه‌ ده‌ره‌وه‌و به‌ره‌و ماڵه‌وه‌ که‌وتینه‌ ڕێ .
بڕیاڕ بده‌ن !!!
به‌ڵام ئێمه‌ چی ئه‌زانین ؟ کاتێک ئه‌مانه‌وێت یارمه‌تی هه‌ژارێک بده‌ین .. سه‌رتاپای ئه‌خه‌ینه‌ ژێر پرسیاره‌وه‌ ، له‌ ناو دڵماندا دونیایه‌ک قسه‌ دروست ئه‌که‌ین تا دڵمان ڕه‌حمێک دروست بکات ، یان باشتر بڵێم بڕیارێک بدات که‌ سودی هه‌ژاره‌که‌ی تێدا بێت !
ئینجا له‌وانه‌یه‌ ڕێگایه‌ک هه‌بێت تا ده‌ستی موباره‌کمان بکه‌ینه‌ گیرفانمان 250 دینار بده‌ین به‌ هه‌ژاره‌که‌ ، ئینجا زۆر دڵمان خۆش ئه‌بێت وای چه‌ند مرۆڤێکی باشم و خێرم کردووه‌ !!!!!
ئه‌گه‌ریش ده‌موچاوی هه‌ژاره‌که‌مان به‌ دڵ نه‌بێت ، یان گه‌نج بێت ، ئه‌ڵێین " ملقه‌وی ، بۆ ناچی ئیش بکه‌یت ، سواڵ بۆ؟ ؟
ئینجا خۆمان زۆر به‌ حه‌ق دا ئه‌نێین و به‌جێی ئه‌هێڵین ، زۆر جوان بڕیاری له‌سه‌ر ئه‌ده‌ین بێ ئه‌وه‌ی ته‌نها بۆ ساتێکیش خۆمان بخه‌ینه‌ جێگه‌ی ئه‌و مرۆڤه‌ !! ئایا ئێمه‌ توانای ئه‌و کاره‌مان هه‌یه‌و نایکه‌ین ، یان هه‌ر ئه‌توانین خۆمان بخه‌ینه‌ جێگه‌ی ئه‌و مرۆڤه‌..........

خوایه‌ گیان ئه‌ی تۆ نه‌تفه‌رمووه‌ که‌ من بڵێم و تێبگه‌م و باوه‌ڕ بکه‌م  و ایمان بێنم ، مالک الیوم دین ( مالکی رۆژی دوایی ) ئه‌و ڕۆژه‌ی که‌ بڕیاره‌ تۆ ڵێپرسینه‌وه‌مان له‌گه‌ڵ بکه‌یت ، وانیه‌ ؟؟ ده‌سا خوایه‌ یارمه‌تیم بده‌ تا بتوانم له‌باره‌ی هیچ که‌سێکه‌وه‌ بڕیار نه‌ده‌م ، امین یا رب العالمین


وه‌رگێڕانی ؛؛ خه‌مبار هه‌ڵه‌بجه‌یی