بسم اللە الرحمن الرحیم
ئەمانە چەند سیفاتێکی بەهەشتن

پێغەمبەر (د.خ) ئەفەرمووێ: "سوێند بەوەی نەفسی منی لەدەستە لەنێوان هەرتاقێک لە تاقەکانی دەرگاکانی بەهەشت وەکو نێوانی مەککە و هەجر و هەجەر و مەککە وایە". متفق علیه.

وەدەفەرمووێ (د.خ) :" ئەهلی بەهەشت هەردەم لاون و پیر نابن و جل و بەرگیان قەت نادڕێ و نارزێ". صحیح.

وە دەفەرمووێ (د.خ) :"لە بەهەشتدا چەند کۆشک و تەلارێک هەنە له‌ناوەوه‌یاندا دەرەوە دەبینرێت و لەدەرەوەیاندا ناوەوە دەبینرێت، خوای گەورە ئامادەی کردوون بۆکەسانێک، کە خواردەمەنی دەبەخشنە هەژاران و بە وشەی خۆش و نەرم و میان ئاخافتن دەگەڵ خەڵکیدا دەکەن و لەکاتی گەرمەی خەوی خەڵکدا هەڵدەستنەوە و شەونوێژ دەکەن".

وە دەفەرمووێ "د.خ": هیچ کەس ناچێتە بەهەشتەوە تاوەکو جێگەی خۆی پێنیشان نەدرێت لەناو دۆزەخ گەر خراپ کار بوایە، بۆ ئەوەی زیاتر سوپاسی خوا بکات. وە هیچ کەسیش ناچێتە ناو ئاگرەوە هەتا وەکو جێی خۆی پێنیشان نەدرێت لەناو بەهەشت گەر چاکەکار بوایە، بۆ ئەوەی ببێتە داخ و نارەحەتی بۆی.

وە ئەفەرمووێ {د.خ}: "گەر خوای گەورە تۆبکاتە ناو بەهەشتەوە ئەوەی چاو و دڵت پێی خۆشە بۆتۆ دەبێت و هەمووی بەدڵی خۆت دەبێت".

وە ئەفەرمووێ {د.خ}: " هەرکەسێک بچێتە ناو بەهەشت خۆش گوزەران دەبێت و هەژار نابێت، وە هەتا هەتایە دەمێنێتەوە و نامرێت و پۆشاکەکانیان کۆنبوون و ڕزینی بەسەردا نایەت و گەنجێتیشیان لەناو ناچێت".

خوای گەورە ڕوونی کردۆتەوە کێ بەهەشتیە و ئەو کارە چاکانە چین کە خاوەنەکانیان دەگەیەننە بەهەشت، لەوانە:

1.    ئەوانەی کە بڕوایان هێناوە و کردەوە چاکەکانیان ئەنجامداوە.

2.    دڵسۆزەکان: واتە ئەوانەی کە نیەتیان لە کردەوەکانیان تەنها بۆ ڕەزامەندی خوایە، نەک ڕەزامەندی خۆی و بەندەکانی خوا.

3.    ئەوانەی کە بەشەو شەونوێژ دەکەن و بەهیوا و ترسەوە لە خوا دەپاڕێنەوە.

4.    ئەو کەسانەی لەهەموو کارێکیاندا پشتیان بەخوای گەورە بەستووە و بە ئارام بوون.

5.    ئەو کەسانەی کە بەردەوامیان هەیە لەسەر ئاینی خوا.

6.    ئەو کەسانەی لە هەموو شتێکدا دەگەڕێنەوە بۆلای خوا، خوای گەورە ئەفەرمووێ: "بەڕاستی ئەوانەی بڕوایان هێناوە بەخوا و ڕاستی بەرنامەکەی، کردەوە چاکەکانیشیان ئەنجامداوە و گەڕاونەتەوە بۆلای پەروەردگاریان و ملکەچ  و دڵ ئارام بوون لەبەرامبەر فەرمانەکانی خوا، ئا ئەوانە خاوەن و نیشتەجێی بەهەشتن و بە هەتا هەتایی تیایدا دەمێننەوە."تەفسیری ئاسان" {سورة: هود-23}

7.    ئەوکەسانەی ترساون لە خوای پەروەردگار.

8.    ئەو کەسانەی خۆیان لە شیرک بێ بەر دەکەن.

9.    ئەو کەسانەی بەخشین و کاری چاکەیان ئەنجام داوە لەبەر خوا.

10.    ئەو کەسانەی کە خشوحیان هەبووە لە نوێژەکانیاندا و دووربوون لە قسەی بێکەڵک و پارێزگاریان لە نوێژەکانیان کردووە.

هەروەها پێغەمبەری خۆشەویستیش {د.خ} ئەوکەسانەی بۆ باس کردووین کە دەچنە بەهەشتەوە لەوانە:
1.    هەژارەکان: ئەوانەی لەسەر هەژاریەکەیان ئارام ئەگرن و سوپاس گوزرن.

2.    موسڵمانە چەوساوە و بێ دەستەڵاتەکان.

3.    هەموو کاربەدەستێکی دادوەر و کەسێکی دڵ نەرم و هەژارێکی داوێن پاکی موسڵمان.

4.    پێغەمبەران {علیکم الصلاة والسلام} و شەهیدان و ڕاستگۆیان و ئەوکەسانەی سەردانی یەکتر ئەکەن لە پێناوی خوادا.

5.    ئەوکەسانەی لای موسڵمانان بە چاکە باس دەکرێن لە بەر چاکە کانیان.

6.    ئەو ئافرەتە موسڵمانانەی کە گوێ ڕایەڵی مێردەکانیانن.


گەورەترین پاداشتی بەهەشت ڕازی بوونی خوایە، کە بەسە بۆ هەر کەسێک خوا لێی ڕازی بێت، خوای باڵادەست جگە لەوەی لەکەسانی بەهەشتی ڕازی یە، پاداشتیان ئەکات لەسەر کار و کردەوە چاکەکان، بە پاداشتێکی نەبڕاوە.



ئامادەکردنی: موسلیم چۆمانی
تایبەت بە: کوردژین

بەسوود وەرگرتن لەم سەرچاوانە:
تەفسیری ئاسان – بورهان محمد امین
ئەهلی بەهەشت - یوسف الحاج أحمد
بەهەشت لە قورئان و فەرموودە صەحیحەکاندا – محمد ملا فائق شارەزووری.